பரமஹம்ஸ யோகானந்தரின் பரமகுருவான ஸ்ரீ ஸ்ரீ லாஹிரி மகாசயர், செப்டம்பர் 30, 1828 அன்று இந்தியாவின் வங்காளத்தில் உள்ள குர்னி கிராமத்தில் பிறந்தார். அனைத்து YSS/SRF பக்தர்களாலும், யோகாவதாரமாக (“யோகத்தின் அவதாரம்”) போற்றப்படும் லாஹிரி மகாசயர் நவீன உலகிற்கு கிரியா யோகத்தை அறிமுகப்படுத்துவதில் முக்கிய பங்கு வகித்தார்.

யோகானந்தர் ஒரு யோகியின் சுயசரிதத்தில் பின்வருமாறு எழுதினார்: “மலர்களின் நறுமணத்தை எப்படி அடக்கிவிட முடியாதோ அதே போல் லாஹிரி மகாசயரும் ஒரு லட்சிய இல்லறத்தாராக அமைதியான முறையில் வசித்து வந்தபோதிலும் அவருடைய இயல்பான மகிமையை மறைக்க முடியவில்லை. பாரதத்தின் ஒவ்வொரு பகுதியிலிருந்தும் தேனீக்கள் போல் பக்தர்கள், ஆன்ம அனுபூதி பெற்ற மகானாகிய லாஹிரி மகாசயரிடம் தெய்வீக அமிர்தத்தை நாட ஆரம்பித்தார்கள்…. இணக்கமான சமநிலையில் செயல்பட்ட அந்த மகத்தான இல்லற குருவின் வாழ்க்கை ஆயிரக்கணக்கான ஆடவர், பெண்டிருக்கு மிகவும் ஊக்கமளிப்பதாக அமைந்தது.”

செப்டம்பர் 30, 2022 வெள்ளிக்கிழமை அன்று லாஹிரி மகாசயரை அவரது அவதார தினத்தில் போற்றும் வகையில் YSS சன்னியாசி ஒருவரால் ஒரு சிறப்பு நினைவுகூறும் நிகழ்ச்சி நடத்தப்பட்டது. இந்நிகழ்ச்சியில் தியானம் அதனைத் தொடர்ந்து ஆன்மீக சொற்பொழுவு நடைபெற்றன.